يا حبيبتى عارفة ليه مش بتكسف لما اقولك يا حبيبتى
رغم فرق السن بينا بعترفلك
إنك انتى حبيبتى ايوة انتى حبيبتى
رغم ان شعرى ابيض وانتى شعرك زى ليل
لمل تيجى تسرحيه وتضفريه يفضل يميل
قلبى يتمايل معاه بس ماقدرشى اغازل
وابقى خايف من عيون حسادك انتى والعوازل
عارفة ليه مش بتكسف لما اقولك يا حبيبتى
رغم ان الكلمة ديه قولتها قبلك لغيرك
وانتى عارفة انى هاقولهالها كتير
اصل انتى وهى صورة بنسختين
واما اقول يا حبيبتى ليكى ولا ليها مين يغير
لا انتى هاتغيرى عليا من هواها او تخافى تاخدنى منك
اصلى حبتها كتير من زمان من يوم ما كانت نفس سنك
بس يظهر فى الحقيقة ان انا حبيتها اكتر لما شوفتك
عارفة ليه مش بتكسف لما اقولك يا حبيبتى
اصل انتى حته منِّى
اصلك انتى اصله منِّى
ايوة حبيتك يا انتى
حلوة وحشة بردو انتى
عارفة ليه مش بتكسف لما اقولك يا حبيبتى
عارفة ليه مش بتكسف
هاتكسف من ايه يا بنتى
يا حبيبتى
